I studiet DKL112N ser vi nærare på samanhengen mellom klasseleiing og læringsdesign i teknologirike klasserom. Digitale verktøy og teknologiske løysingar pregar livet vårt både i og utanfor skulen. I skulen og klasserommet skal læraren halde fast ved skulen si kjerneverksemd samstundes som han/ho skal tilrettelegge for bruk av digitale verktøy i elevane sitt læringsarbeid.

Læringsdesign inneber her å ha eleven sine føresetnadar og moglegheiter for meistring som utgangspunkt for fokus på planlegging, utforming og gjennomføring av læreprosessar som også involverer teknologi. Her legg vi også fokus på baklengs planlegging.

Klasseleiing er ein pedagogisk kjernekompetanse som handlar om læraren si evne til å tilrettelegge for elevane si faglege og sosiale læring, individuelt og i fellesskap. Denne kjernekompetansen blir ofte utfordra i møtet med teknologi.

I DKL112N har vi fokus på samspelet mellom læringsdesign og klasseleiing, og vektlegg studenten si utvikling av eigen yrkespraksis. Emnet tek utgangspunkt i det daglege virket til pedagogen og har ei praktisk tilnærming til undervisningsplanlegging, anten for den vidaregåande skulen, for ungdomsskulen eller barneskulen.

Studenten planlegg undervisning for sine elevgrupper (der dette er mogleg) med utgangspunkt i både grunnleggjande ferdigheiter og fagspesifikke læreplanar. Studentane får opplæring og erfaringspraksis i planlegging og utforming av undervisning med digitale verkty, og kunnskap om ulike metodar, læringsressursar og verkty for ulike typar læringsaktivitet og kurs. Emnet kan takast som ein del av eit årsstudium, eit halvårsstudium, eit deltidsstudium eller som eit sjølvstendig emne.