Dette nettstudiet gir ei innføring i korleis generativ kunstig intelligens (GenKI) kan brukast i ulike skriveprosessar og fag, med særleg fokus på ungdomstrinnet og vidaregåande opplæring. Emnet vil gi innsikt i utfordringar og moglegheiter i korleis GenKI kan støtte og påverke skriveprosessar der elevar arbeider saman. Studiet har fire tema:

•  Kunstig intelligens, profesjonsfagleg digital kompetanse og literacy
•  Prosess-skriving som prinsipp og metode
• Samskrivingsaktivitetar med KI som støtte
• Samtalerobotar og samarbeidslæring

Målgruppa for emnet er lærarar i grunn- og vidaregåande skule. Målsettinga er å sette læraren i stand til å vurdere om, når og korleis GenKI kan takast i bruk i samskriving for å støtte elevane si læring.

I det praktiske arbeidet vert det gitt høve til å fokusere på ønska aldersgruppe og fagområde. Øvingar og mappeoppgåver vil dekkje både praktisk arbeid med ulike KI-verktøy og didaktisk refleksjon. Studiet har tett fagleg oppfølging, framovermeldingar og gir høve til samarbeid eller individuelt læringsarbeid. Til eksamen leverer kvar student ei eksamensmappe basert på arbeidskrav ein jobbar med undervegs.

Ved slutten av emnet skal studenten vere i stand til å vurdere relevansen av å ta i bruk KI-verktøy i samskrivingsprosessar, og integrere læringsfremjande bruk av GenKI i eiga undervising.