Emnet tek føre seg ulike tilnærmingar til analyse av tekst og meining. Gjennom tolking av tekst og menneskelege handlingar i samfunnet er hermeneutikk eit sentralt utgangspunkt for emnet, og det vert lagt vekt på tekstar både som studieobjekt i seg sjølv og som meiningsberande forskingsmateriale generelt. Emnet vil ta føre seg språkvitskaplege, litteraturvitskaplege, filosofiske, historiske og religionsfaglege tilnærmingar til tekstanalyse.

Sentralt i emnet vil vere ulike teoretiske tilgangar til forståing av tekst og tekststruktur, kva språkleg meining er og til tolking av tekstar. I tillegg vert det lagt vekt på korleis ein kan forstå tilhøvet mellom tekst og kontekst, historisitet og intertekstualitet. Eit viktig mål med emnet er å gje ph.d.-kandidatane innsikt i eit breiare utval av tilnærmingar til tekstanalyse enn dei har i eige prosjekt, samstundes som dei får høve til å fordjupe seg i teoretiske tilnærmingar som er relevante for avhandlingsarbeidet.