Merkesteinane og HVO klare for Garsar film og kulturfestiaval i Litauen
Ein felles delegasjon frå Merkesteinane og Høgskulen i Volda reiser til Litauen 19. april. Målet elles med turen er å ta del i Garsas Film og Kulturfestival i byen Panyvesis. Å orientere om drifta til Merkesteinane og tilboda ved Høgskulen i Volda vert også viktig for delegasjonen. I tillegg skal ein vitje dagsenteret i Panevesys for funksjonshindra.
Første målet er Vilnius. Der skal dei møte representantar for den norske ambassaden.
Sentralt under opphaldet vert å knyte kontakter med lokale og regionale litauiske styresmakter med tanke på framtidig samarbeid og kunnskapsutveksling - særleg kopla opp mot funksjonshindra sin situasjon.
På film- og kulturfestivalen skal merkesteinfilmen It's Hard to Be a Rock'n Roller visast som opningsfilm.
Trass i at Merkesteinane denne gongen ikkje har med seg leiaren sin, Øyvind Lied, - grunna armbrot, vil representantar for gruppa likevel stille opp med ein minikonsert. Leiarane for Merkesteinane og representantar for Høgskulen i Volda skal under opphaldet halde ei felles førelesing med vekt på den norske HVPU-reforma og velferdsstaten.
Merkesteinane vil med dette nytte høvet til å takke Johan Barstad ved Møreforsking/Høgskulen i Volda/Kontoret for pasientinformasjon for Litauen-initiativet; Og ikkje minst for all hjelp under førebuinga til denne turen.
