Hovudmålet med emnet er å gjere kandidatane i stand til å svare på forskingsspørsmål gjennom innhenting og analyse av kvantitative data. Gjennom emnet vil kandidaten få inngåande kunnskap om ulike framgangsmåtar i kvantitativ forsking. Moglegheiter og avgrensingar som ligg i dei vanlegaste tilnærmingane innafor samfunnsvitskapleg metode vert særleg vektlagd. I emnet vert det drøfta kva slags problemstillingar ein kan gripe med dei ulike tilnærmingane, korleis tolke resultat og kva føresetnadar som gjeld for ulike typar data eller analyse.

Særleg vekt vil verte lagt på gjennomføring av korrelasjons-, faktor-, og regresjonsanalysar så vel som hypotesetesting. Her vil ein aktivt arbeide med eksisterande datasett og undersøke om dei føresetnadane som gjeld for dei ulike analysemetodane er stetta, samt diskutere og nytte alternative tilnærmingar når det trengst.

Emnet skal gjere kandidatane i stand til å nytte statistiske analysemetodar, samt underbygge og argumentere for eigne val av metodologiske og analytiske tilnærmingar. Utforming av forskingsprosjekt, datainnsamling og utnytting av kvantitative data vert vektlagt. For å sjå samanhengen frå forskingsspørsmål via forskingsdesign, innhenting av data, gjennomføring av statistisk analyse og til resultat, samt vala som er gjorde undervegs, vert fleire aktuelle forskingsprosjekt publiserte i internasjonale fagfelle vurderte tidsskrift gått grundig gjennom. Difor er det ein føresetnad at kandidatane aktivt deltek på seminaropplegget i diskusjonar rundt val og bruk av ulike forskingsmetodar.