Digital kompetanse inneber å forstå korleis teknologi, kultur, utdanning og samfunn heng saman og påverkar kvarandre, og digital humanioraforsking er eit veksande felt som kan opne nye område og metodar for kandidatane. Emnet byggjer på nasjonale og internasjonale prosjekt ved Høgskulen i Volda og gjev høve for kandidatane til å knyte sitt eige arbeid til større nettverk.

Kritisk medvit om digitale praksisar står sentralt i kurset, saman med reiskap til å ta del i eit mangfaldig, digitalt samfunn og forskingssamfunn. Emnet vil ta føre seg tema som metodar og teori for digital humanioraforsking på historiske og/eller samtidige tekstar og kjelder, arbeid med digitale forskingsplattformer, kombinere fjernlesing og nærlesingsmetodar og nytte korpusverktøy. For digital utdanningsforsking kan tema vere lærar- og elevrolla i endring ved innføring av nettbrett, kritisk tenking, arbeid med multiple tekstar og utvikling av djupare forståing ved ulike typar tekstarbeid. Det kan også handle om skrive- og leseutvikling ved ulike modalitetar (papir eller digitalt) og korleis nytte kunstig intelligens til utvikling og læring. Der det ligg til rette for det kan kandidatane arbeide med tekstkorpus, databaseutvikling og design og visualisering av forskingsdata.