Kjetil Børhaug: ti år som professor II ved HVO
Børhaug takkar av etter ei rekordlang tilsetjing som professor II ved Høgskulen i Volda (HVO). Sidan 2016 har UiB-professoren spelt ei viktig rolle ved Institutt for planlegging, administrasjon og skuleretta samfunnsfag (IPAS) på HVO.
Tidlegare ASH-dekan Odd Ragnar Hunnes (t.v.) saman med Kjetil Børhaug.
Kjetil Børhaug, professor ved Institutt for politikk og forvaltning ved Universitetet i Bergen, blei i 2016 kalla som professor II til Avdeling for Samfunnsfag og Historie (ASH), Institutt for planlegging, administrasjon og skuleretta samfunnsfag (IPAS), ved Høgskulen i Volda (HVO). Han takkar no av etter ei rekordlang tilsetjing som professor II ved høgskulen.
Det var dåverande dekan, Odd Ragnar Hunnes, som formelt sørgja for at Kjetil Børhaug blei kalla som professor II for perioden 2016 til 2018. Børhaug fekk særleg ei viktig rolle i utarbeidinga av mastertilbodet i samfunnsfag i grunnskulelærarutdanninga og leiinga av ei forskargruppe i samfunnsfagdidaktikk. Erfaringa frå dei to åra med samarbeid var så gode at Børhaug blei kalla til ein ny periode som professor II for åra 2018–2022 og endå ein periode for åra 2022–2026.
Blei takka for framifrå innsats
Ved ei markering 26. mai takka instituttet Børhaug for framifrå innsats gjennom ti år som professor II. Tidlegare dekan Odd Ragnar Hunnes trekte særleg fram Kjetil Børhaug sitt arbeid med to antologiar som fagmiljøet i Volda har medverka til: Spadestikk i Samfunnsfagdidaktikken 1 og 2 (Fagbokforlaget). Kapittel frå desse bøkene har vore mykje brukte i undervisninga ved instituttet. Børhaug har også hatt arbeidsoppgåver knytte til kollegarettleiing, rettleiing på ph.d.- og masternivå og noko undervisning.
Ved markeringa hadde også Kjetil Børhaug eit innlegg der han la fram sine refleksjonar knytte til dei nye innhaldslistene i samfunnsfaget for grunnskulen. Etter innlegget blei det livleg diskusjon om kva som bør vere innhaldet i samfunnsfaget i grunnskulen framover.
Instituttleiar Ådne Meling takka Børhaug på vegner av IPAS. Sjølv om Børhaug no formelt avsluttar tilsetjingsforholdet sitt ved høgskulen, ser tilsette ved instituttet fram til å samarbeide med Børhaug også i åra framover.
