Presenterer kritikarrost bok i Volda
HVO-førsteamanuensis Åsmund Svendsen er nominert til Kritikarprisen for biografien sin om historikaren Jens Arup Seip. Torsdag 5. mars kan du møte forfattaren og høyre om boka i høgskulebiblioteket.
HVO-førsteamanuensis Åsmund Svendsen er nominert til Kritikarprisen for biografien sin om historikaren Jens Arup Seip. Foto t.v.: HVO / Steinarr Sommerset. Utsnitt av bokomslag t.h.: Forlaget Press.
Hausten 2025 gav førsteamanuensis Åsmund Svendsen ut biografien Jens Arup Seip. Historikeren og hans land til lovord frå bokmeldarane i rikspressa.
Boka om den svært sentrale norske historikaren Seip (1905–1992) har vekt stor interesse etter utgivinga, som mellom anna er grundig omtalt i Khrono. I februar blei det klart at Svendsen er nominert til den høgthengande Kritikarprisen. I grunngivinga for nominasjonen blir boka mellom anna omtalt som ei danningshistorie av sjeldan kaliber.
Svendsen jobbar til dagleg ved Historisk institutt på Høgskulen i Volda (HVO). Torsdag 5. mars kl. 11.30 markerer vi derfor lanseringa ved å invitere til samtale med forfattaren i høgskulebiblioteket – les meir om arrangementet her.
Glad for mottakinga etter mangeårig arbeid
Svendsen fortel at det er mange grunnar til at han ville skrive biografien om Jens Arup Seip.
– Hovudgrunnen er at eg er interessert i historiefaget som ein sosial praksis, etablering av kunnskap om samfunnet i eit historisk perspektiv. Då er det interessant å undersøkje korleis historikarane har skapt den kunnskapen, og korleis historikarar før skapte si historie – og då er biografien ein svært god sjanger å arbeide med.
Han er glad for å sjå den gode mottakinga etter mange års arbeid.
– Det har vore ei stor glede og svært tilfredsstillande. Eg har arbeidd med boka sidan sommaren 2017 og som ledd i stillinga mi ved HVO. Det har teke tid, og då er det godt å sjå at boka blir lesen.
Historikaren som har forma oss
Under bokpraten på høgskulebiblioteket torsdag blir temaet biografisjangeren, sakprosa, det norske historiefaget og sjølvsagt kva betydning Seip har hatt.
– Som historikar skapte Seip tolkingar av moderne norsk politisk historie frå 1814 til 1960-åra, og dette var tolkingar som gleid inn i norsk daglegtale, poengterer Svendsen.
Han viser til at vi framleis bruker omgrep frå Seip som embetsmannsstaten (den norske staten på 1800-talet), fleirpartistaten (frå 1884 til 1940) og eittpartistaten (Arbeidarparti-staten frå 1945 til 1960-åra) til å forklare norsk historie.
– Min tanke er at slike omgrep festar seg og blir ein del av språket vårt som vi bruker til å forstå oss sjølve og verda, seier forfattaren.
Nøkkelfigur og offentleg intellektuell
Ingen enkeltperson har vore viktigare for historieskrivinga om Noreg i det tjuande hundreåret enn Jens Arup Seip, skriv Forlaget Press i omtalen av boka.
I norsk samanheng var Seip ein stor og kjend mann og ein offentleg intellektuell, forklarer Svendsen:
– Han var dessutan som intellektuell knytt til venstresida politisk, og han var klart mot NATO, mot Vietnamkrigen og mot norsk medlemskap i EF [no: EU]. Men sjølv om han stemte Arbeidarpartiet og var sosialist, retta han hard kritikk mot Arbeidarpartiet for å vere anti-liberalt og ha altfor låg takhøgd for intern debatt.
Resten av historia får du av Svendsen i høgskulebiblioteket torsdag – velkomen til boksamtale!
